ថ្ងៃ អាទិត្យ ទី ១២ ខែ កញ្ញា ឆ្នាំ ២០១០
(រូបថត ជោគជ័យ)
ដឹកនាំដោយលោកគួច ចំរើន អភិបាលខណ្ឌមានជ័យ និងលោកហេង ធៀម អភិបាលស្រុកកៀនស្វាយ រួមតំណាងនៃមន្ទីររៀបចំដែនដី នគរូបនីយកម្ម រាជធានីភ្នំពេញ និងខេត្តកណ្តាលផងដែរ
រាជ ធានីភ្នំពេញ ៖ គណៈបញ្ជាការឯកភាពខណ្ឌមានជ័យ និងគណៈបញ្ជាការឯកភាពស្រុកកៀនស្វាយ ដឹកនាំដោយលោកគួច ចំរើន អភិបាលខណ្ឌមានជ័យ និងលោកហេង ធៀម អភិបាលស្រុកកៀនស្វាយ នាព្រឹកថ្ងៃទី១២ កញ្ញា បានឯកភាពចុះពិនិត្យព្រំប្រទល់ ឃុំចំនួន៤ក្នុងស្រុកកៀនស្វាយ ដែលរាជរដ្ឋាភិបាលកាត់បញ្ចូលជាក្របខណ្ឌរដ្ឋបាលគ្រប់គ្រងរបស់ សាលារាជធានីភ្នំពេញ ។ នាឱកាសនោះក៏មានការអញ្ជើញចូលរួមពីតំណាងនៃមន្ទីររៀបចំដែនដី នគរូបនីយកម្ម រាជធានីភ្នំពេញ និងខេត្តកណ្តាលផងដែរ ។
លោកគួច ចំរើន មានប្រសាសន៍ថា ការកាត់បញ្ចូលព្រំសីមាចំនួន៤ឃុំ របស់ស្រុកកៀនស្វាយមកខណ្ឌមានជ័យ គឺគ្រាន់តែជាការកំណត់ព្រំប្រទល់ភូមិសាស្ត្រប៉ុណ្ណោះ ដោយឡែកអាជ្ញាធរដែនដីមានមេឃុំ នគរបាលប៉ុស្តិ៍ ឬក៏ក្រុមប្រឹក្សាឃុំនីមួយៗ គឺនៅបន្តកិច្ចការរដ្ឋបាលរបស់ខ្លួនដដែល គ្មានការដោះដូរអ្វីឡើយ ។ រីឯបញ្ហាទំនាក់ទំនងគ្នារវាងអាជ្ញាធរដែនដីស្រុកកៀនស្វាយ និងខណ្ឌមានជ័យ ក៏នៅតែដូចដើម ។ ព្រំប្រទល់នៃឃុំទាំង៤ ដែលត្រូវកំណត់តាមបណ្តោយផ្លូវជាតិលេខ១ គឺខណ្ឌត្រឹមវត្តវិចិត្តរាម ហៅវត្តធម្មយុត្តិ គឺជាព្រំដីរវាងខណ្ឌមានជ័យ និងស្រុកកៀនស្វាយ ។
ដោយឡែកច្រកខាងត្បូងគិតតាមបណ្តោយផ្លូវលេខ ៣៦៩ គឺកំណត់ព្រំខណ្ឌត្រឹមចន្លោះព្រំប្រទល់ភូមិប្ញស្សីស្រុក និងភូមិព្រែកថ្មី ។ ដោយឡែកបឹងបួរ និងព្រំប្រទល់ផ្លូវលំក្នុងភូមិ គឺត្រូវកំណត់តាមផែនទី ដែលអាជ្ញាធរខណ្ឌ និងស្រុកមានក្នុងដៃរៀងៗខ្លួន ។ ឃុំដែលត្រូវកាត់បញ្ចូលជាសង្កាត់ចំណុះឱ្យរាជធានីភ្នំពេញ មានឃុំវាលស្បូវ ឃុំព្រែកឯង ឃុំក្បាលកោះ និងឃុំព្រែកថ្មី ។ ទំហំផ្ទៃដីរួមរបស់ឃុំទាំង៤នោះគឺ៥.៨០៨ហិកតា ក្នុងនោះផ្ទៃដីបង្កបង្កើនផលមានចំនួន២.០៣៦ហិកតា ៕
Post a Comment